Okuloplastika
Göz qapağı cərrahiyyəsi
Göz qapağı əməliyyatları həm funksional, həm də estetik nəticə verir. Sallanmış qapaq görmə sahəsinin yuxarı hissəsini bağlaya bilər — bu halda müdaxilə yalnız görünüşlə bağlı deyil.
Blefaroplastika nədir?
Blefaroplastika göz qapağından artıq dəri və piy toxumasının götürülməsi əməliyyatıdır. Göz qapağının dərisi bədənin digər nahiyələrinə nisbətən daha tez qocalmağa başlayır: 30 yaşdan sonra bu nahiyədəki dəri elastikliyini itirir və sallanır. Bu dəyişikliklər insanı yorğun və yaşlı göstərir.
Əməliyyat təcrid olunmuş şəkildə və ya digər estetik müdaxilələrlə birlikdə aparıla bilər. Blefaroplastikadan sonra yalnız üz ifadəsi cavanlaşmır — sallanmış qapaq aradan qaldırıldığı üçün periferik görmə sahəsi də yaxşılaşır.
Hansı hallarda müraciət olunur?
- üst göz qapağında artıq dərinin sallanması və görmə sahəsinin daralması;
- alt göz qapağında piy toxumasının qabarması — “göz altı torbalar”;
- ptoz — göz qapağının anadangəlmə və ya sonradan yaranan sallanması;
- göz qapağının forma və mövqe pozuntuları.
Əməliyyata hazırlıq
- Tam göz müayinəsi və göz qapağı funksiyalarının qiymətləndirilməsi aparılır.
- Quru göz sindromu varsa, bu mütləq nəzərə alınır — əməliyyat şikayətləri artıra bilər.
- Qəbul edilən dərmanlar, xüsusilə qanı durulaşdıranlar, həkimə bildirilməlidir.
- Gözlənilən nəticə və məhdudiyyətlər əvvəlcədən müzakirə olunur.
Göz qapağının digər xəstəlikləri
Xalyazion
Xalyazion göz qapağındakı yağ vəzinin və ya kirpik follikulunun iltihabıdır. Göz qapağında şişkinlik və müayinə zamanı görünən düyün ilə başlayır. Diaqnoz üçün klinik müayinə kifayət edir. Erkən mərhələdə konservativ müalicə nəticə verir, ağır hallarda cərrahi müdaxilə tələb olunur.
Təkrarlanma halları çox vaxt immun sisteminin zəifliyi ilə əlaqəli olur. Risk faktorları arasında sinus və adenoid iltihabları, diş infeksiyaları, şəkərli diabet, gigiyena qaydalarına riayət etməmək, kontakt linza istifadəsi və soyuqlama var.
Blefarit
Blefarit göz qapağının iltihablı xəstəliyidir; hər yaşda və hər iki cinsdə rast gəlinir. Anatomik və klinik olaraq ön və arxa blefarit formalarına ayrılır. Gözdə yanma, qızartı, kirpik dibində qabıqlanma ilə özünü göstərir və müntəzəm qapaq gigiyenası tələb edir.
Gözyaşı kanalı tıxanıqlığı
Göz yaşı normalda gözün iç küncündən burun boşluğuna axır. Kanal tıxandıqda göz daim sulanır, qızarır və infeksiya riski artır. Böyüklərdə müalicə antibiotik, damcı, kanalın yuyulması və ya cərrahi müdaxilə — dakriosistorinostomiya (DSR) — ilə aparılır.